Despois do primeiro, do segundo e do terceiro, chega un prematuro cuarto boletín en pleno Día do Libro (fortuíto) porque teño un capacho de cousas que che contar.

Lembra que podes recomendar a outras persoas que se subscriban e que, se queres, podes contactarme a través da rede de redes.

A VONTADE DE DEUS · O meu novo poemario está contigo; nada che falta. 

140 páxinas. 13 apartados. Un único e verdadeiro deus que contén a Santísima Trindade conformada polo Poema, o Poeta e Ti. E ao final que? Todo está roto.

Xa está dispoñible na web de Edicións Positivas e tamén na maioría de librarías do país. Se non o encontras na túa libraría de sempre, solicítallo sen problema.

Agora estamos metidos na parte de levalo porta por porta. Alén da presenza en prensa e entrevistas que irán vendo a luz nestes días, o que realmente me entusiasma é poder recitar os poemas que están aquí contidos.

Xa temos as primeiras datas confirmadas. As que se vaian engadindo anunciareinas a través de web e pode que (non, Samuel, non o digas) novos boletíns:

• 24 de abril / 20.30h / Sede de Edicións Positivas / Compostela
• 3 de maio / 20.00h / A Revolteira / A Coruña
• 4 de maio / 12.00h / Libraría Cartabón / Vigo

Nos próximos boletíns irei contando algunhas intimidades do poemario. Se hai algunha en concreto sobre a que che gustaría que me detivese, coméntamo.

LER LECTURAS · Non paro de recomendar a obra de Billy Collins a todas as persoas coas que me cruzo. Se aínda non cha recomendara a ti, será porque aínda non nos cruzamos.

Siete elefantes de pie bajo la lluvia, foi, con Navegando a solas por la habitación, a primeira tradución que lle lin. A mirada e capacidade de desenvolver unha profundidade universal sobre o cotián é fascinante. Próbao.

Ah, na rede podes encontrar moitas mostras do bo de Billy recitando, como para non catar algunha delas.

RECITA RECITANTE · Participo na edición deste ano dun dos festivais poéticos referencia en Galicia: a Poesía Salvaxe de Ferrol.

Intervirei en recitais os días 25 e 26 de abril, pero mellor bótalle un ollo a toda a programación.

MÚSICA MUSICAL · Ata agora recomendei cancións e discos, pero neste boletín vouche propoñer un reto.

Hai uns anos creei unha playlist en Spotify que ten como único requisito que a canción comece, exclusivamente, cun golpe de batería illado e, a continuación, arrinque a canción como se nada. A lista tituleina Pum e dálle. 

O reto é: coñeces máis cancións que inicien con este recurso, cun solitario "pum"? Podes mandarme as túas propostas ao meu correo. Ollo, que non é tan fácil como parece!

DOCUMENTO DOCUMENTAL · A canle Archivo N+ contén un boa colección de material audiovisual do redor da década dos oitenta en México. Quitando os fragmentos de programas, o máis interesante que encontrarás son os brutos de entrevistas realizadas pola rúa con cuestións tan amplas (e concretas) como: "¿Qué significa ser joven?", "¿Qué significa la navidad para ti?", "¿Te gustan los hombres calvos?", "¿Qué piensas de la infidelidad?" ou "¿Ya te dieron el aguinaldo?".

Pureza de contido 100%.

APUNTAMENTOS RAROS NO MÓBIL · Este apuntamento pretendía ser o punto de partida para escribir unha versión do orixinal de Espronceda, pero incidindo nunha total indefinición. A idea era algo así:

Con una cantidad indeterminada

de cañones por banda,

a una velocidad incierta navega

una ambigua embarcación.

Cando me puxen a escribilo no seu momento decateime de que a idea non me levaba a ningún sitio e descarteino, pero aquí che presento este apuntamento raro que funciona máis como premisa que como resolución. Pimba!

ISTO ESCOITEINO · Un tipo estaba dicíndolle isto a outro fulano na terraza da cafetería San Agustín, como tratando de explicar algo que fixera un terceiro:

—Foi pedir bogavante a Valladolid.

Non sei se a expresión comunica a literalidade de que alguén solicitou ese marisco nesa cidade ou era, e isto é o que quero pensar, que ese suxeito cometeu algún equívoco buscando algo onde non debía ou albergaba unha falsa expectativa.

Sexa como sexa, a expresión "foi pedir bogavante a Valladolid" ten trazas de frase feita que podería ser empregada en moitos contextos. Aí cha deixo! Túa é; miña non.

Samuel L. París

Visita a web | Contacto | Privacidade