Este boletín chega entre catarreiras e desvelos tusivos. 

Será máis breve que o 1º, o 2º, o 3º o 4º e o 5º (aínda que os poña en ligazón para que ti, nova persoa subscrita, poidas revisalos) debido a que son un cretino.

Lembra que podes propoñer con delicadeza a outras persoas que se subscriban e podes contactarme en calquera horario.

RECITA RECITATORE · 14.433 días despois, este cretino recitará en Muros. Presento O único e verdadeiro deus das cousas que están feitas un cristo o venres 14 ás 20.00 no Centro de Patrimonio Marítimo.

O MOVEMENTO · Bailar "Someone like you", de Adele, sobre manteiga. Esa é a premisa deste vídeo. 

A peza, un enigma do que este cretino non pode afastar a vista, é unha montaxe sobre esta intervención da artista Melati Suryodarmo. A alteración mellóraa? Pode ser, "but sometimes it hurts instead".

A CATAPULTA · O luns 10 (hoxe) quico, poeta maiúsculo caligrafeado en minúsculas, visita A Catapulta.

Podes seguir a emisión en directo a partir das 19.30h en Youtube e Twitch.

LE COAS ORELLAS · A literatura que che recomendo nesta ocasión é a "Miudiño Session" de Columna Vegana. Destaco os dous primeiros textos, "Xamón" e "Mantra do crédulo". A este cretino pareceulle unha xoia.

APUNTAMENTOS RAROS NO MÓBIL · Pronunciar o nome de Jennifer López cun esaxerado acento estadounidense pode ser algo así: /llénifa lóupes/.

Imaxina escoitalo así por primeira vez e entender que o nome é realmente "Jenni Farlópez". Como para non pensar que está metida en algo turbio! Como para non vincular o seu éxito profesional co apoio do cártel! Se se apelida Farlópez! 

Outro caso resolto polo Detective Cretino.

MÚSICA MUSICAL · Nos últimos meses recunquei bastante nesta obra mestra de Al Green.

Hai unha lixeira sensación de que este disco viaxou desde 1973 ata 2024 para significarme como un cretino.

ISTO ESCOITEINO · Un grupo de rapazas falan sobre borracheiras no fondo do autobús o día que o Dépor ía celebrar o ascenso en Catro Camiños. 

Entre as diferentes intervencións, esaxeradas e falsamente provocativas (escatoloxía, racismo...), conversan sobre a cantidade de copas que toman cando saen. Unha delas comenta que a semana anterior bebeu uns 15 cubatas, pero que non lle afectaron nada. Unha das súas compañeiras diagnostica a cuestión cunha marabillosa visión paracientífica:

—Es que con la rabia no te sube tanto.

O cretinismo nunca cesa.

Samuel L. París

Visita a web | Contacto | Privacidade