Ola!

Non sei por que nunca abro os correos cun saúdo canónico. Un "ola" de manual. Un "ola" do primeiro punto do temario. Así que hoxe dinme o gustazo de soltarche un magnífico "ola" exclamativo. Non me convence moito, pero as costumes sociais están para algo e ao mellor a ti préstache.

Se queres que saúde ás túas amizades e ás túas rivalidades, recoméndalles que se subscriban a estas newsletters. E, caso de que che apeteza, lembra que tes como mandarme un "ola".

MÚSICA MUSICAL · Un libro, un filme ou un disco sempre é unha novidade ata que o probas por primeira vez. Logo do episodio da Catapulta de xuño, quico (el escribe o seu nome en minúscula) recomendoume o EP "Cómo hacer crac" de Nacho Vegas, en concreto, a canción "En mi nueva vida". Acabou sendo a miña banda sonora do verán.

Recomendable de principio a fin.

RECITA RECITATORE · O 12 de outubro (día de que?!) estarei no C.S. Gomes Gaioso da Coruña tomando un vermutiño e recitando textos de O único e verdadeiro deus das cousas que están feitas un cristo. Todo ás 12.30h, que é unha hora marabillosa para o asunto poético. 

LER LECTURAS · Recoméndoche La semilla inmortal de Jordi Balló e Xavier Pérez.

Trátase dunha obra na que se revisan os motivos argumentais que se repiten no cinema amosando a súa relación con relatos anteriores. É moi útil para descubrir e afondar en filmes, literatura e, tamén, para encontrar ideas.

A CATAPULTA · Logo da visita de Esther F. Carrodeguas no último episodio, A Catapulta recibirá o furacán Luix Kaf o luns 21 de outubro.

Poderás seguir a conversa co turboartista a partir das 19.30h nas canles de Youtube e Twitch de El Salto.

INTERNETO PESADO · Mentres traballaba nun texto que requeriu que me pasase por varios xornais en busca de material (sports!), encontrei este  fragmento de Internet que capturei.

En concreto, é de Mundo Deportivo, mais é a merda que podes encontrar en calquera outra web: publicidade explícita distribuída sen sentido, publicidade encuberta en modo de reportaxes, novas que van ás tripas, trampas para imbéciles... En resume, un sumidoiro.

Era isto o que queriades?

UNIVERSO UNIVERSAL · Das 13 seccións do meu último poemario, só hai tres que manteñen unha conexión evidente: as agrupadas ao redor do concepto do "universo" e das tres partes que o compoñen.

—Que tres partes dis, Samuel?

Se partimos de ti mais eu, podemos entender que o universo se divide exactamente no universo de alí fóra, o que nin ti nin eu percibimos; o universo de aí diante, o que ti mais eu percibimos e compartimos; e o universo de aquí dentro, que é o fragmentiño de universo que eu conteño no meu interior e que eu vexo e que ti, para a túa sorte, non.

Esta observación, rotunda e incuestionable, desenvolvina cando Estíbaliz Espinosa me convidou a participar nun evento poético no Centro Astronómico de Pena Trevinca e me propuxo que fixese algo que tivese relación co cosmos (ou todo isto, como se observe). Esta división axudoume a estruturar o recital e, máis adiante, foi o punto de partida para avanzar no novo libro; sendo o universo de alí fóra o poema que abre o libro e dous poemas do universo de aquí dentro os que o pechan.

APUNTAMENTOS RAROS NO MÓBIL · Esta nota é autoexplicativa. 

O mundo é dos tolos. 

Samuel L. París

Visita a web | Contacto | Privacidade