Un nunca sabe cando vai perder a cabeza por completo, así que preferín enviarche este correo antes do que se vén nas próximas datas. O clixé diría que a seguinte newsletter podería ser unha «mensaxe nunha botella», pero obviaremos esa posibilidade.

Mentres, lembra que podes recomendar a quen queiras que se subscriba a estas newsletters. Por que non, verdade? E lembra tamén que se me queres contactar para calquera cuestión, telo ben, ben fácil.

EU ATENTEND'O MEU AMIGO · Nas vindeiras semanas estarei illado. 

—Como illado? Nunha illa?

Si! Formo parte da Residencia Literaria da Illa de San Simón. Alí avanzarei nun proxecto poético no que levo indagando nos últimos meses e que [ELIMINADO].

Procurarei [ELIMINADO] e máis tarde [ELIMINADO]. Crucemos os dedos e que isto [ELIMINADO] como Jack Torrance.

Ireiche contando.

LER LECTURAS · Que non te freen as iracundas reaccións que está a espertar Economía e poesía: Rimas Internas de Yolanda Castaño para ler a súa reflexión sobre a profesionalización do oficio poético.

Que non te freen. Que non, que non, que non.

RECITA RECITATORE · Hai uns meses estiven presentando O único e verdadeiro deus das cousas que están feitas un cristo na Libraría Cartabón de Vigo. Tratáronme xenial e rexistrárono nunha peza fílmica sen precedentes.

MÚSICA MUSICAL · Mayalde é un grupo de música tradicional castelá especializado no que denominan «música da alma».

Nos seus concertos mesturan música e divulgación, como nesta coñecida intervención ao redor dunha mesa.

DOCUMENTAL DOCUMENTO · «A vida era isto?». 

Se algunha vez te formulas esa cuestión, recoméndoche esta reportaxe do Canal Extremadura na que se achegan á figura de Ángel Avis, coñecido como o «Espartero de Plata». 

Alimenta o espírito escoitar como reflexiona sobre a súa profesión.

ISTO ESCOITEINO · Tarde de sol de agosto. Dous rapaces á porta do Eroski de Serres, en Muros. Sentados. Suados. Cansados. Comparten o silencio que permite estar baldado. 

Ao cabo dun pedazo, un diríxese ao outro, como contestando a unha cuestión que deixaran uns minutos no aire:

—Non creo que haxa tabaco no ximnasio.

Precisamos algo máis para saber que eses dous nos caen ben?

Samuel L. París

Visita a web | Contacto | Privacidade