Funme enleando. Recoñézoo. Despois dunhas semanas fóra e con todo o que tiña que contarche, non se me ocorre outra cousa que redeseñar a web por completo. Ideas que ten un!

Por iso, esta newsletter chégache un chisco tarde e quedan fóra dela cousas que irán nunha que enviarei nuns días. Con todo, tráioche un carromato de contidos, recomendacións e anuncios. Dosifícao como consideres.

Recórdoche que podes recomendar a quen queiras que se subscriba a estas newsletters e que me podes contactar para calquera cuestión.

EU ATENTEND'O MEU AMIGO · Tal e como anticipei no meu anterior correo, as dúas primeiras semanas de novembro paseinas illado, na Residencia Literaria da Illa de San Simón. Se ben a priori valorara a posibilidade de escribir algunha newsletter alí, dinme conta de que non era o seu e voume explicar.

Á Residencia fun buscando (utilitarista) tres cousas: deixar listo para revisión o proxecto poético que presentei á convocatoria, aprender de compañeiros de fatigas e axudalos no que fose posible. Así o detallei na miña solicitude.

O primeiro que aprendín foi a modular a idea de busca e a importancia de acompasar o paso e o latir ao espazo, ao legado, á compañía e aos textos. Só así apareceu aquilo que nun principio pretendía, pero, tamén, reconfiguralo e abrir novas preguntas e camiños.

 —Samu, non teño nin idea do que estás falando. Só quero saber como foi e seguir coa miña vida!

Foi xenial. Coñecín e aprendín de persoas talentosas e marabillosas, con proxectos sensacionais, nunha contorna e circunstancias incribles.

E no que refire á materia textual? Finalicei aquela introspectiva idea que levara na maleta e outro proxecto máis. A estes súmolles máis proxectos que quedan iniciados e con vontade de deriva. Moito mellor que ben.

Penso que xa contei abondo, non? Continuemos esvarando...

LER LECTURAS · A fortuna levoume a compartir en outubro conversa con Francisca Melo no Festival Internacional de Poesia do Porto. O día antes de nos coñecer, aproveitei para mercar A Importância do Pequeno-Almoço na libraría Poetria.

Logo da conversa e de escoitala recitar, sabía que tiña que mergullarme no poemario. E non pode resultar máis recomendable! Poesía con pulso, peso, rabia e tenrura. Se o tes ao teu alcance, achégate a el.

RECITA RECITATORE · O sábado 30 de novembro estarei en Pontevedra canda Tamara Andrés presentando poemario no Culturgal. Ela presentará o seu Para non concretarme e eu O único e verdadeiro deus das cousas que están feitas un cristo. Todo ás 18.00 na órbita do stand 42, o de Edicións Positivas. 

Furtivismo poético non solicitado.

Por certo, pode que nos vindeiros días tamén anuncie un novo artefacto que se presentará no Culturgal. Caso de que se confirme, enviareiche novo correo explicando os aspectos máis lesivos desta proposta artística.

MÚSICA MUSICAL · Seguramente non che estea descubrindo nada se che digo que Hermanos Gutiérrez teñen unha das propostas máis engaiolantes hoxe en día, pero, se non os coñeces, recoméndoche darlles unha escoita.

A súa sonoridade resultou clave para a miña viaxe literaria na Illa de San Simón, sobre todo, co seu disco El camino de mi alma.

A CATAPULTA · Logo dun mes de novembro en branco porque patatín patatán, en decembro volvemos tensar os mecanismos poéticos da Catapulta. A convidada será Rosalía F. Rial.

Poderás seguir a conversa en directo nas canles de Youtube e Twitch de El Salto o luns 2 de decembro a partir das 19.30h.

Se a espera che parece longa, podes ver os programas anteriores.

CONFERENCIA CONFERENCIANTE · Aínda que para algunhas persoas é moi coñecida, déixoche ligazón á exposición do escritor Kurt Vonnegut da súa teoría sobre a "forma da historias", divertida e interesantísima.

Se non coñeces a figura de Vonnegut, recoméndoche escoitar o episodio que lle dedicaron no podcast Grandes Infelices.

DOCUMENTAL DOCUMENTO · Algunhas das mellores cousas da vida chegan deixándose ir.

Esta reflexión insular lembroume, xa de regreso ao continente, o impresionante documental de 1950 Kon-Tiki e a súa apoloxía do potencial revelador da deriva.

ISTO VINO · Mentres me somerxía na obra de Julio Jaramillo, estrela musical do Ecuador dos anos 50, na procura dos versos que abren o disco de Hermanos Gutiérrez antes referido, encontreime esta pequena creba: todos os títulos das súas cancións rematadas en ".wav".

Obviamente, trátase dun descoido de quen se encargou de subir as cancións ás plataformas dixitais; pero gústame a idea do bo de Julio, xa no Guayaquil de mediados de século XX, emperrenchadísimo en titular as cancións desa forma tan ciberpunk.

—Donde vosotros escucháis un bolero, yo atisbo el futuro. Mis tangos son para las computadoras.

Julio, tremendo visionario.

Samuel L. París

Visita a web | Contacto | Privacidade