Cadernos de actividades? Almanaques? Música que ninguén sabe onde estaba? Anécdotas non solicitadas? Esta newsletter chega cargadiña como unha nécora cunha mochiliña do Decathlon para crustáceos na que dentro hai, á súa vez, máis nécoras.

Recomenda a quen queiras que se subscriba a estas newsletters e contacta comigo se o consideras necesario. Necesario e xusto.

POEMARIONOVA · Sempre quixeches probar a enredar coa poesía? Mesturar distintos materiais textuais e crear nova vida? Escribir unha cantiga medieval a alguén que detestas? Simplemente queres pasar un bo momento ríndote de todo?

Xa está dispoñible o Poemarionova, un caderno de actividades poéticas co que poderás elaborar os teus propios textos, con instrucións lúdicas e irreverentes.

Ademais, tal e como se indica na obra, podes compartir as túas creacións no formato que desexes a través do correo poemarionova@paris.gal.

As obras recibidas, iranse publicando na sección da miña web dedicada a tal fin, porque a lóxica é a lóxica, poñas como te poñas.

MÚSICA MUSICAL · Mentres nos envorcallamos no noso Wrapped 2024 de Spotify, é importante lembrar que non todo remata nesta plataforma. Por iso e por máis motivos hai uns días reunín 20 ausencias galegas en Spotify, con discos e bandas que paga a pena coñecer.

CEOS POÉTICOS · Un poema do libro O único e verdadeiro deus das cousas que están feitas un cristo forma parte do almanaque mural 2025 de Ceos Galegos (CeosGalegos25), que combina 14 imaxes de destacados fotógrafos nocturnos e astronómicos con textos de autoras como Luna Miguel, Estíbaliz Espinosa, Berta Dávila e Carmen Conde. 

Os beneficios da súa venda, dispoñible na web e puntos indicados, sosteñen este proxecto de divulgación científica e cultural.

A CATAPULTA · Debido a circunstancias imprevistas, o programa no que recibo a Rosalía F. Rial na Catapulta finalmente celebrarase o vindeiro día 16 de decembro ás 19.30h.

O programa poderá seguirse, como sempre, en Youtube e Twitch en directo directérrimo.

ANÁLISE ANALÍTICA · Tracklib é un servizo que permite a produtores musicais samplear música orixinal. Isto, a min, dáme igual. O que me gusta é que teñen unha canle en Youtube onde fan didácticas e visuais análises de cancións creadas a partir de samples (fragmentos doutras cancions).

Déixoche dous exemplos que che poden molar moito, un brevísimo e outro máis longo. O breve é a análise do tema "The Rockafeller Skank" de Fatboy Slim e, o máis extenso, a análise dos samples da música electrónica máis icónica ano a ano desde 1990.

ISTO ESCOITEINO · De camiño ao choio adoito atravesar unha das zonas máis pijas da Coruña. Nesta zona é habitual cruzarme con outras persoas igual de perdidas na experiencia ca min. 

Foi o caso de dúas persoas que pasaron ao meu lado saíndo dun deses negocios que zumegan tecnofascismo e clasismo en dose 50/50. Estas dúas persoas, sen dúbida, ían falando sobre alguén que deixaran na tenda e, polas súas caras e expresións, dinme conta que se referían ao que consideramos un FLIPADO. 

O mellor foi como sintetizaron o avoengo do fulano (lembremos que entre os pijos abunda a sobrecarga patronímica):

—¿Pero eso es un apellido o un podcast?

Samuel L. París

Visita a web | Contacto | Privacidade