Por riba do monte de mazapáns, despois da morea de polvoróns, detrás do cúmulo de roscóns, alén os panettones, turróns e doces, chega esta newsletter para rematar de encher esa túa alma na que non colle nin unha molécula máis. E, vaia por diante, agardo que teñas un bo ano, porque o contrario sería un despropósito.

Antes de dar paso ao puro contingut, lémbroche que en 2025 podes recomendar aos teus seres menos queridos que se subscriban a estas newsletters e que podes contactarme sempre que queiras.

LUSTRO LUSTROSO · Estes días agasalláronme cun Hobonichi Techo de cinco anos. Trátase dun caderno que pode funcionar a modo de axenda, planificador ou diario, xa que ten oco para cada día, ademais doutras seccións accesorias.

É habitual que cando inicia un ano novo poidas pensar no que estará por vir, no que che gustaría que pasase. Se iso pode superarte, non che quero contar o que supón plantarte diante dos vindeiros 1.827 días coas súas horas e minutos, cada un posto detrás do outro.

Ademais desa proxección a futuro tamén cabe a cuestión previa de analizar como foron os anteriores cinco anos para imaxinar como serán os seguintes. Aí pensas na xente que apareceu, na que desapareceu, na que apareceu e desapareceu, nos bos momentos e en como cambiou todo.

Aínda que dubidei se empregar o caderno a modo de diario, finalmente comecei a escribir uns pequenos versos e textos breves cada día. Non sei como irá evolucionando, pero cando volva dicirche que pasou con este caderno, estaremos a comezos de 2030. Estaremos? 

Estarás aí? 

Estarei?

SAMUEL RECOMENDA SAMUEL · Hai unha serie que se chama Samuel sobre un cativo de 10 anos a comezos do 2000. Está dispoñible completa na web e na canle de Youtube de Clan, pero non significa que sexa unha serie infantil.

Está creada cunha enorme sensibilidade, un trato exquisito dos detalles que dan significado a unha biografía e os capítulos son de menos de 5 minutos. Se non dispós dese tempo, non entendo que fas lendo esta newsletter.

REACCIONA REACTOR · Como estamos no día de Reises, tráioche un bocato di cardinale: Xente negra reaccionando aos versos iniciais da canción “Down Rodeo” de Rage Against the Machine. Os versos din: “Estou camiñando por Rodeo cunha escopeta. Esta xente non viu un home de pel marrón desde que os seus avós mercaron un”. 

Podes ver as referencias da letra neste artigo.

LEMA LEMÍTICO · Uns anos atrás, non preguntes como, comezamos na casa a tradición de poñerlle un lema (un slogan) aos anos antes de que comecen. 

O deste ano, non preguntes por que, é...

2025: 2024 con pistolas

CONTA CONTATORE · Para uns vídeos da AELG preguntáronme cal era a orixe da miña vocación literaria e por que comecei a escribir.

Esta foi a miña resposta.

MÚSICA MUSICAL · A banda sonora do xogo Top Gear da Super Nintendo acompañoume na transición da felicidade do momento da infancia á incomprensión do que non é.

Esta versión do tema principal do xogo das mans afiadas e repletas de unllas do brasileiro Fabio Lima contén unha estraña emoción que me custa dixerir (ao igual que me pasa coa decoración do seu set).

MOVE O MOVEMENTO · No vídeo titulado “Como atrapar un canguro” podes ver como atrapar un canguro.

Simple.

APUNTAMENTOS RAROS NO MÓBIL · Non é unha pregunta; é un mantra. Proba a dicir isto en voz alta, a repetilo como un autómata. En nada verás que é puro continente, un son hipnótico carente de contido. 

Que webs hai guays? Que webs hai guays? Que webs hai guays? 

Quegüesaisguais!

Xamais esquezas o poder máxico arbitrario das palabras.

Samuel L. París

Visita a web | Contacto | Privacidade