O ano avanza como un dogo canario famento polos corredores dun parvulario. As newsletter acumúlanse na túa bandexa de entrada como se acumulan contra os vidros da fiestras os párvulos aterrados ante a irrupcion dun dogo canario famento na aula. Con todo, é preciso manter a calma, aceptar a trabada liberatoria e admitir que o que é, é.

Como sempre, lembra que podes recomendar a quen che apeteza que se subscriba a estas newsletter e contactarme cando che preste.

MÚSICA MUSICAL · Que pasa se mesturas a musicalidade de Fela Kuti co imaxinario e discurso político sudamericano? Entendo que é algo semellante ao que comparten os chilenos Newen Afrobeat neste disco homónimo. 

O traballo permite unha escoita de corrido moi boa, pero podes catar a primeira canción, que inclúe un inicio cun discurso de José Múgica precioso, para ver se encaixa co teu tempo e a a túa alma.

REVISTA E NON VISTA · Igual xa sabes que pronto se publicará o meu novo libro. O que igual non sabes é que no último número da Revista Grial podes encontrar un adianto de catro poemas da nova obra.

A CATAPULTA · O luns 20 de xaneiro o dúo Columna Vegana estará na Catapulta, o programa sobre poesía galega que armo canda a xente de El Salto.

Poderá seguirse en directo a partir das 19.30h en Youtube e Twitch.

Se recibes estes meus correos desde o inicio, pode que lembres que che recomendara escoitar a súa Miudiño Session da Regueifa.

NON SE VENDE · O pasado 14 de decembro de 2024 intervín na V Marcha Cívica pola Devolución da Casa Cornide, na Coruña. Recitei un texto escrito para a ocasión e a xente da plataforma A Coruña Non Se Vende pasoume o vídeo do momento. Telo aquí canda o texto transcrito.

LER LECTURAS · Creo que aínda non recomendara nas newsletters un texto teatral e alégrame que o primeiro sexa Reconversión de Santiago Cortegoso. A obra é unha marabilla. Ten unha mestura do íntimo co social realmente emocionante, na que emprega ironía, humor, tenrura e un uso exquisito e xustificado dos recursos literarios.

Consulta na web de Ibuprofeno Teatro as datas das representacións e non a deixes pasar. Eu tiven sorte e conseguín unhas das últimas entradas na fin de semana da estrea na Coruña.

ISTO ESCOITEINO · Hai uns días rexistrei este fragmento conversacional que penso que ten chicha:

—Amazon borrou 1984.

—O ano?

A primeira persoa referíase, como ben intúes, á obra de Orwell; mais a segunda, quizais por unha preguiza involuntaria do intelecto, pregunta se está a falar do ano. Pero, que proposta é esa? Insinúa que Amazon colleu e borrou todo o que ten de 1984: obras, filmes, discos...? Que, por unha estraña teima, Bezos retirou de almacéns e servidores todo o etiquetado co ano 1984? 

Ou peor: o magnate dono da megacorporación decidiu eliminar o ano 1984? Suprimiu o espazo de tempo pretérito delimitado entre os cuartos soando no carillón a finais de 1983 e o segundo cava máis barato do supermercado explotando en xúbilo no abrir de 1985? En que incomprensible limbo diacrónico nos deixa á xente nada nese ano? Vaia delirio de multimillonario eliminar determinados períodos... Amancio Ortega borrou a semana santa do 93, Bill Gates fixo desaparecer o entroido de 2005... O pesadelo orwelliano levado ao límite.

No fondo, é entendible a procura do deserto, non cres?

Samuel L. París

Visita a web | Contacto | Privacidade