Agardo que esteas a ler isto a unha temperatura agradable. Eu escribo devecendo polo concepto do amparo integral do anorak do doutor Fleischman en Doctor en Alaska. 

Esta newsletter será breve, pero contén a promesa de novidades na seguinte entrega. Por? Porque o meu novo poemario entrou no prelo hai uns días e pronto poderei contarche máis sobre el, sobre presentacións e... chas!

A CATAPULTA · A poeta Yolanda Castaño visita A Catapulta o luns 10 de febreiro ás 19.30h.

O programa poderá seguirse en directo a través de Youtube e Twitch. Chas!

LER LECTURAS · Cando ves a primeira páxina de El color de las cosas podes pensar: “Que interesante esta perspectiva para arrincar unha obra...”. Se folleas o resto do libro, comprobarás que o recurso se mantén en todo momento. Isto, polo menos, foi o que me pasou cando me acheguei á obra do suízo Martin Panchaud, presentada desde unha perspectiva cenital e esquemática que sorprende.

Unha pequena xoia que revolucionou o mundo da banda deseñada (feito que souben despois, a verdade) e que deberías ler se queres encontrar algo novo dentro deste mundo. Ademais, a narración está dosificada con moito gusto e mantén o interese en todo momento.

REFIRE REFERENTE · Na Asociación de Escritoras e Escritores en Lingua Galega (AELG) preguntáronme: "Cales son os referentes, as lecturas, que alimentan a túa obra e que circunstancias biográficas chas facilitaron?".

Ante tremenda enredadeira, aparece o enredo.

MÚSICA MUSICAL · Que son ten este disco! Que aroma anello! Bombo y Maracas de Clímaco Sarmiento y su Orquesta é un disco para escoitar dunha pasada, pero tamén para recuncar en cancións como “Moliendo café” (a miña banda sonora mental das últimas semanas), “Cumbia sabrosa” ou a inicial “La cigarra”.

Aí está: un clarinetista colombiano nado en 1916 comunicándose contigo nun 2025 tonto, estúpido e necio.

Se tes un momento, recoméndoche a lectura da crónica da desaparición de Clímaco, na que poderás ver como un indio que fixo bailar a tantas xeracións morreu agardando unha pensión e indignado ante as exiguas regalías que lle devolvían as súas creacións.

APUNTAMENTOS RAROS NO MÓBIL · De camiño ao traballo encontrei unha furgoneta co rótulo: “Manuel Rivas Boquete. Construcciones”.

Idiota como son, a primeira interpretación que a miña mente alcanzou ante tal mensaxe foi: “Manuel Rivas ten unha empresa de construción...”. E ademais, para a empresa emprega un segundo apelido relacionado co sector, "Boquete", como adaptando o seu nome para darlle contexto e certa credibilidade ao business.

A partir de aí comecei a pensar en todas as empresas que Manuel Rivas podería ter na Coruña:

• Manuel Rivas Molete. Panadería.
• Manuel Rivas Billete. Asesoría económica.
• Manuel Rivas Alfinete. Costura.
• Manuel Rivas Carrete. Estudo de fotografía ou Efectos Navais.
• Manuel Rivas Foguete. Pirotecnia.
• Manuel Rivas Salmonete. Peixería.
• Manuel Rivas Chupete. Pediatra.
• Manuel Rivas Xarrete. Carnicería.

Posibilidades formais infinitas. Impulso económico alicerzado na confusión. Emprender desde o segundo apelido ata que faga tope. Chas!

Samuel L. París

Visita a web | Contacto | Privacidade