Agardo que esteas a ler esta newsletter aproveitando os últimos lategazos do inverno. Marzo está a pasar co seu habitual "PERO PERO PERO ISTO QUE É MEU DEUS ISTO QUE É?!" e coa promesa de que a primavera (enganosa) ha traer luz, flores e a imaxe dun capitalismo a nadiña de colapsar diante dos nosos sistemas de navegación.

Lembra que podes recomendar esta newsletter a quen queiras que se subscriba compartindo a ligazón que poño aquí debaixo. Podes compartila co texto "You have been Samuelized!", pero só e unha suxestión de presentación.

E agora, falemos do goberno.

O TENRO É O SALVAXE · Se a pregunta é "Samuel, acabas de publicar un novo poemario?", a resposta ten que ser afirmativa. 

En cambio, se a pregunta é "Samuel, o teu novo poemario titúlase O tenro é o salvaxe e escribíchelo na súa maior parte durante a túa estadía na Residencia de creación literaria Illa de San Simón e foi duro e fermoso a partes iguais e no posterior proceso de edición contaches coa experta man de Tamara Andrés e estás moi orgulloso da forma final que adquiriu o texto mesmo na súa maquetación e tes moitas ganas de comezar coas presentacións o 10 de abril na Coruña?", pois a resposta tamén é afirmativa.

Agora ben, no suposto de que a pregunta fose "Samuel, se un tren sae de Moscova en dirección á Coruña cargado ata os topes de exemplares do teu novo poemario a unha velocidade de cen quilómetros por hora e outro tren sae da Coruña a unha velocidade constante de oitenta quilómetros por hora en dirección a Moscova cheo ata arriba da falta de empatía que caracteriza o teu paso polo mundo, que pasará cando os sistemas automatizados de freo non respondan en condicións ante a chegada do estrondo?", a resposta ten que ser dubitativa, cando menos.

LER LECTURAS · Aínda non recomendara aquí ningunha das xoias de Daniel Clowes, un autor que narra dun xeito único, a medio camiño entre o sórdido, o feble e o fondamente emocional.

Se non lle liches nada, recoméndoche Mister Wonderful. É do máis canónico a nivel de recursos, tanto a nivel de desenvolvemento de trama como de trato das personaxes, pero co carácter abondo para percibir que o fulano ten un talento innegable.

RECITA RECITATORE · "Un home sorrí coas mans abertas nunha miniatura dun vídeo. Está en Internet e non o sabe. Ou si?". 

Este é o punto de partida do novo microfilme de Samuel L. París, no que podemos seguir a este personaxe lendo textos dunha obra futura (naquel momento) a golpe de luns de decembro para o ciclo "A literatura galega nas súas voces". 

Que é a literatura galega? Uns folios.

Que son as súas voces? A voz dun muradán que non vocaliza.

MÚSICA MUSICAL · Creo que non sabía o que agochaba este disco ata que, nunhas vacacións en Cadaqués, pasamos unha tardiña escoitándoo mentres mirabamos un solpor escorrendo pola ladeira dun monte coas pupilas abertas en oito como un parque acuático

Como todos os discos de The Dandy Warhols, a mellor escoita para este Dandys Rule Ok é a seguida de principio a fin, pero, se cres que non tes tempo, escoita os tres últimos temas, o seu "It's A Fast-Driving Rave-Up With The Dandy Warhols Sixteen Minutes", co seu preludio e final.

Cando cadres comigo e me vexas coa mirada perdida nun punto, seguramente dentro estea soando isto.

A CATAPULTA · Silvia Penas visitou A Catapulta, o programa que dirixo e presento canda a xente de El Salto e O Salto. Falamos da mirada sobre a obra, da procura e do colectivo. 

APUNTAMENTOS RAROS NO MÓBIL · A idea de entrar na consulta do médico e que o tipo te reciba co estetoscopio a modo de cinto asíndolle o pantalón, mesmo por riba da bata. Ten o estetoscopio atado de forma penosa por riba da roupa, á altura da cintura. Uf... un bo golpe estético-sanitario, non? 

Polo demais, un profesional impecable: pregunta o que debe, observa, consulta, proba, diagnostica. Nada que advirta ningunha anomalía na experiencia paciente-doutor máis alá desa desorde do accesorio inesperado.

Estamos ante un xenio ou un tolo? Ti escolles, como sempre.

Samuel L. París

Visita a web | Contacto | Privacidade