Preséntase o libro novo? Non se presenta? Si se presenta e, como xa sei cando e onde, envíoche un mail con moi pouca revisión ortotipográfica e grandes doses de "oh, non, non pode ser, ti outra vez, non pode ser, válgame deus".

Lembra recomendar esta newsletter aos teus peores inimigos compartindo a ligazón que poño aquí debaixo. Podes enviárllela acompañada do texto "Estou lonxe da casa, cariño, e só teño esta ligazón para amosarche todo o que non fun quen de coñecer sobre ti", pero, claro, só é unha suxestión.

E agora, falemos de xeopolítica.

O TENRO É O SALVAXE · As pezas serían: Moito Conto, O tenro é o salvaxe, 12 de abril, Tamara Andrés, recital poético, A Coruña, 12:30h, Samuel L. París, presentación, sábado.

Mentres enredas con este crebacabezas informativo, comparto esta fotografía que nos fixo Nela a Tamara e a min durante a Residencia de creación literaria Illa de San Simón (onde escribín a ampla maioría de textos do libro e lle demos a formiña que agora ten) e que me parece a imaxe promocional dun dúo de synthwave-ambient finés (si é que iso existe).

Haberá máis presentacións das que irei informándoche nas vindeiras newsletters. Se o corpo tira de ti cara á poesía, podes conseguir o libro agora mesmo.

MÚSICA MUSICAL · Hai unhas semanas descubrín o disco Juegos de Prohibidos da banda barcelonesa Fuera de Sektor e ten algo que me conquistou. Non sei se é a sonoridade (que me lembra os últimos discos de Juanita y los Feos) ou a súa poética escura, pero proxectan certo magnetismo.

Se non os controlabas, dálles unha escoita a bo volume.

TENRURA SALVAXE · Non tiña claro se compartir isto, porque son un puto agonías e non adoito falar do que me ilusiona; pero hai uns días recibín esta mensaxe dunha persoa que admiro moito (moito) e que, a verdade, non sei ben de onde sacou o meu teléfono.

Foi raro emocionarme ata a lágrima e seguir currando, porque a vida non se detén. 

Sen máis.

Continuemos.

LER LECTURAS · Recoméndoche Metalabel, un espazo de cooperación entre persoas creativas, onde encontrar material e reflexións interesantes sobre o traballo creativo. 

Como exemplo, deixo este post breve de Yancey Strickler: Doom now and forever? Interesantes reflexións sobre a validación, promoción e sobre se se pode cambiar o xeito de proceder e estar no terreo da creación.

ISTO VINO · Todas as posibilidades na porta dun negocio da rúa da Torre da Coruña:

• CERRADO
• NUEVAMENTE ABIERTO
• PARA ENTRAR LLAMAR AL TIMBRE
• PEDIR CITA TAMBIÉN ATIENDO SIN CITA
• 25 ANIVERSARIO GRACIAS POR SU FIDELIDAD

Unha contradición absoluta que fala dunha alma atormentada polas decisións. Difícil non sentirme identificado con esta irregular disposición de carteliños. Pechado, aberto, pide cita, pero tamén sen cita.

A humanidade vivindo un gran momento.

Samuel L. París

Visita a web | Contacto | Privacidade