Cando Manolo García soltou o de “nadie es mejor que nadie” non tiña presente a imaxe viva de Rafael Hernando.

Esta é unha newsletter máis para ti. Libros, presentacións, podcasts, a desfeita do cotián... Todo nun correo electrónico que atravesará varios servidores e, probablemente, varios estados-nación ata chegar ao teu dispositivo.

Onde te agochaches?

PIFOSTIO · Esta é a capa do meu próximo libro: Pifostio. Como sabes se levas tempo seguindo estes correos, é a miña primeira incursión no terreo da narrativa.

61 textos. 61 bofetadas. 61 caricias.

Sae á luz o 8 de maio con Xerais e xa o tes en prevenda.

MÚSICA MUSICAL · Mans de mamífero.

Un agasallo das árbores.

A CATAPULTA · O luns 21 de abril ás 19.30h celebrarei un novo episodio da Catapulta. Visitará o programa o escritor, poeta e dinamizador literario Tiago Alves.

Todo en Youtube e Twitch. Youtube é una plataforma de vídeo de Alphabet, matriz de Google. Twitch pertence a Amazon.

PODCAST PODCASTIL · Mitos & memes, "un podcast sobre o que o vello Internet e as novas ciencias humanas nos ensinan sobre as redes nas que vivimos", é tan improbable como necesario.

Quizais o programa coas achegas máis interesantes e enriquecedoras que teño encontrado.

O TENRO É O SALVAXE · A vindeira presentación de O tenro é o salvaxe terá lugar na Numax (Santiago de Compostela) o 16 de maio ás 19.00h. Mentres, podes mercar o libro na túa libraría de confianza.

(Graciñas a todas as persoas que vos achegastes á presentación na Moito Conto. Foi emocionante, de verdade).

A NEWSLETTER NEWSLETTEA · Activei unha mensaxe automática para novos subscritores. Así, cando alguén se apunte a recibir estes correos, recibirá o arquivo con todas as newsletters enviadas a modo de presente repleto de veleno.

Como seguramente ti te apuntaches antes, déixoche esta ligazón para que teñas da túa man. 

Non a vincularei en máis sitios. Que quede entre nós. Un bo momento para recomendar ás túas amizades que se subscriban.

ISTO VINO · Unha das rutas que me leva ao traballo ten a parte de boa de ver o mar da Praia do Orzán e de Riazor (distintas praias, mesmo mar). Iso si: ten o hándicap de ter que paparme un sopapo luminoso dunha pantalla publicitaria nun paso de peóns da Praza de Pontevedra no que hai que agardar uns minutos. Si ou si.

Hai uns días o cartel tivo un problema e amosoume as entrañas da besta: o escritorio dalgún coitadiño en lugar do carrusel de vídeos corporativos agardados. Unhas iconas e o fondo de pantalla da nada. A agradable inactividade. O fracaso do impacto axuda a aturar o camiño ao traballo no que botaremos máis leña na cheminea do Capital.

Vitorias tan pequenas que nin vitorias son.

Samuel L. París

Visita a web | Contacto | Privacidade