Queres comezar a semana cun capacho de bloques informativos que non sabías que necesitabas? Aquí chega esta newsletter, fresca como un día fresco.

Por certo, seguro que o lembras, pero LEMBRA que podes recomendar a outras persoas que se subscriban á newsletter compartindo esta ligazón. Estarás colaborando cunha grande labor social e coa miña ausencia de descanso.

CONVERSA CONVERSATORIO · O mércores 11 participarei na Cidade do Libro de Vilagarcía.

Estarei asinando libros a partir das 19.00 e, ás 20.30, intervirei nunha das "Conversas ao Solpor" canda Andrea F. Maneiro e Clara Pino, coa moderación de Susana Pedreira.

Unha vez máis, dígoche onde vou estar en determinado momento da semana, facilitándoche que veñas contarme a idea que tiveches para montar un musical sobre o balor que lle sae aos limóns cando pasas uns días fóra da casa.

LER LECTURAS · Un libro de poesía que é unha proba de son.

Un libro de poesía que é unha proba de son.

Título: hola hola hola hola.

Autor: Rafael Guijarro.

Xoia.

O TENRO É O SALVAXE · Novo recital e presentación do poemario O tenro é o salvaxe. Desta volta será o venres 13 de xuño na Libraría Social ULA na Serra de Outes ás 20.30h. Acompañarame Tamara Andrés. 

(Íache dicir que teño gañas de coñecer mellor a ULA e o seu proxecto, do que me teñen falado tan ben; pero non nos detañamos niso).

MÚSICA MUSICAL · Os composteláns Samesugas publican novo traballo: "White Fire". Aínda que recoñezo que teño en repeat estes días o tema "Do Barreiro a Lisboa", nos 10 cortes do disco encontrarás momentos moi luminosos, como as guitarras da canción "Meet Again".

Ademais, aproveitaron para subir a Spotify todos os seus discos, o que supón que teño que actualizar o meu artigo "20 ausencias galegas en Spotify" e que poidas gozar dunha intensa sesión da que seguramente sexa a mellor banda de rock deste recuncho do mundo.

Ah! E "White Fire" conta con deseño de capa de Guillotina Estudio. Selo "De la Iglesia".

A CATAPULTA · O 16 de xuño ás 19.30h visita A Catapulta Estíbaliz Espinosa. 

Será o último programa antes do parón do verán. Probablemente retome todo en setembro. Ándame rondando a idea de darlle un cambio ao programa, pero iso queda para outra newsletter.

Mentres, recomendaríache botarlle unha escoita a programas anteriores, como o de Nuno de Grande Amore.

ZIGZAGATORE · Fostes varias persoas as que me preguntastes onde encontrar a última entrevista no ZigZag.

Deixéivola ao fondo de Internet, metida nun tupper.

PIFOSTIO · Este pedaciño da newsletter é para agradecervos a todas as persoas que me estades enviando tan boas palabras sobre o Pifostio, as vosas fotografías con el na casa ou librarías e tamén a todas as que me acompañastes na presentación na Berbiriana. Estou moi agradecido.

Se che gusta, recoméndao ou déixallo a esa persoa que cres que lle pode molar. Espállese o Pifostio!

O MOVEMENTO ·  Cando descobres que existe o ioga con cabras, a tentación é a de pensar cantas cousas puiden facer todos estes anos engadíndolle o elemento "cabras"? 

En serio, próbao. Exemplo: declaración da renda con cabras. Éxito!

ISTO ESCOITEINO · Indo recoller unha encarga á libraría, crúzome con dous tipos de cincuenta anos longos, de vestir despreocupado e cinética amable. 

Un dille ao outro con ton de natural honestidade:

—Yo, si tengo la cocina recogida, ya me parece que todo está bien.

Cimentar desde o núcleo.

A partir de aí: o mundo.

Samuel L. París

Visita a web | Contacto | Privacidade