Este é o primeiro boletín que envío desde a miña nova web e, antes de seguir co asunto, quería agradecerte que te apuntases a isto totalmente a cegas. Coma ti, hai unhas cantas persoas máis subscritas (moitas máis das que agardaba) e iso alégrame porque [FRAGMENTO ELIMINADO]. Se che mola, lembra que podes convidar a máis xente a subscribirse, porque, en fin.

O destes boletíns (newsletters, si) non era algo que tivese pensado facer, pero, como era unha opción que me ofrecía directamente a web, pensei: "Que diablos?!". Ademais, esta primavera publicarei novo poemario e pensei que este podía ser un bo xeito de comentar algunhas cousiñas sobre el con calma, por exemplo, dando contexto a algunhas das decisións que tomei, comentando algunhas das referencias que hai nel, etc.

—O deseño terá sempre este nivel de excelencia, oh, Samuel?

Non o creo.

—O contido sempre vai ser esta crudité de 180 quilos? 

Quen sabe. Polo de agora, e deixando á marxe este saúdo-agradecemento-prólogo, envíoche algo de info sobre os proxectos literarios nos que ando, os últimos programas da Catapulta, algunhas recomendacións e achados e mais unha sección rara sobre apuntamentos raros que teño gardados no teléfono e que conteñen un lote de erros de escrita porque en lugar de dedos teño salchichas de Frankfurt (crudité).

Se tes unha suxestión ou comentario, podes facermos chegar ao correo que aparece na sección de contacto da web.

PROXECTA, QUE ALGO QUEDA ▶ A poesía tenche que gustar porque lle gusta a todo o mundo. Iso é así. Por iso xa teño un novo poemario no forno de Edicións Positivas. Agás sorpresa, publicarase nos vindeiros meses. Pronto detallarei algúns aspectos sobre a obra, pero si que podo adiantarche que teño moitísimas ganas de recitar o que leva metido dentro.

O que si podo anunciar é que o 9 de marzo estarei recitando na libraría Porta XIII de Vila Nova de Cerveira (Portugal), o marabilloso espazo do grandísimo escritor angolano Luandino Vieira.

A maiores disto? Pois acabo de rematar o primeiro borrador do que é a miña primeira colección de relatos breves. Esta semana vou repartilo entre unhas poucas persoas escollidas para que lle poidan dar unha lectura e que me comenten como o ven.

É un terreo novo para min e, aínda que me divertín como nunca escribíndoos, necesito ver se ao outro lado alguén o entende. E é que a colección é un bo remexido de formatos e estilos nuns 40 ou 50 textos (non os contei, que desgraciado!); polo que descoñezo se fóra deste cranio ten sentido. Así que a ver que comentarios veñen de volta e despois seguirei picando pedra nela, engadindo novos textos... Igual nunhas semanas vai todo para un caixón, pero, en fin...

LER LECTURAS ▶ Como é o primeiro boletín que che envío, non vou poñerme moi michi-michi. Recoméndoche un texto satírico de Kike García que ten un título bastante transparente: "¿Habéis estado ya alguna vez en nuestro restaurante? ¿No? Oh, vaya, pues eso hará el proceso de pedir comida algo complicado, pero yo os lo explico".

Ademais dunha das mentes detrás de El Mundo Today, García ten un espectáculo de stand-up moi chulo en Filmin que, se che molou o texto, seguro que che cunde.

A CATAPULTA ▶ Xa se pode ver e escoitar completo o noveno episodio da Catapulta, o programa sobre poesía e pola poesía que fago para a xente de O Salto Galiza e El Salto, no que recibín a visita de Fran Alonso, poeta, escritor e director de Xerais. Démoslle ao palique durante varias horas, aínda que gravamos só unha pequena parte; porque todo non se pode amosar, claro.

A vindeira cita da Catapulta será coa grandísima Helena Salgueiro e poderá seguirse o 20 de xaneiro ás 19.30h nas canles de Twitch e Youtube do Salto.

O MOVEMENTO ▶ Hai uns días cruceime con esta hipnotizante marabilla do coreógrafo belga Sidi Larbi Cherkaoui na canle ARTE Concert. Se che gusta, que saibas que a obra completa está na mesma canle.

MÚSICA MUSICAL ▶ Algo teñen os veteranos do reggae cando se poñen a facer discos a partir do 2000. Foi o caso do Rebirth de Jimmy Cliff (con produción de Tim Armstrong de Rancid mediante) e é o caso de Vision de Clinton Fearon. Un discazo, cun son moi orgánico e no que o bo de Clinton parece que se deita tranquilo sobre a música, sen perseguila nin ir por diante.

Se queres ver se este disco é para ti, proba  "Sleepin' Lion", un tema cun cúmulo de sentencias e máximas que che lembran que, ás veces, hai que permitirlle á música que nos diga claramente que hai que facer. Outra cousa é que fagamos caso, claro.

FORMACIÓN FORMATIVA ▶ Os límites foron cruzados hai tempo. Que exista a Burger King® University só é un recordatorio. Para cando o Posgrao na Tortilla do Pontejos? U-lo Mestrado en Hamburguesas de Canguro do Tentempé do Orzán?

APUNTAMENTOS RAROS NO MÓBIL ▶ E que por que os días que cambian a hora (ás 3 son as 2 ou ás 2 son as 3) nos informativos da televisión non van facer unha reportaxe a un establecemento dos que están abertos 24 horas? Como lles concirne? O cambio de hora afecta realmente ao servizo que os define! Un 24 horas é un 24 horas se está aberto 23 ou 25 horas no día? Moitas preguntas; ningunha resposta.

ISTO ESCOITEINO ▶ Un señor asomouse á porta da tenda de Movistar que hai na praza de Pontevedra da Coruña para lle dicir a unha das traballadoras, que sorriu durante a escena e mesmo celebrou o comentario: "Cada día te veo una arruga menos".

To the limit.

Samuel L. París

Visita a web | Contacto | Privacidade