Bio – Samuel L. París

Escribir sobre un mesmo empregando a terceira persoa é repugnante. Estamos de acordo. Unha vez aclarado isto, ás veces é preciso contar con esta información reunida para que quen a precise poida recollela e saír pitando.

Samuel L. París é un escritor e poeta nado en Muros en 1984.

Como escritor publica en 2008 o Manual da destrución no Netlabel A Regueifa e en 2012 Inflamable en Edicións Positivas. Durante todo o 2013 escribe e publica un poemario completo á semana no seu blog. En 2015 publica, baixo demanda, 25 poemarios con textos inéditos e exclusivos escritos integramente a man. En 2020 coordina a antoloxía Internacional de Poesía Anarquista, publicada en Edicións Positivas. En 2023 lanza unha serie de novos poemas enviándoos en postais.

En 2024 publica o poemario O único e verdadeiro deus das cousas que están feitas un cristo, de novo con Edicións Positivas.

Ao longo de todos estes anos ten ofrecido numerosos recitais no país e fóra del e participado nos principais festivais e eventos poéticos.

Formou parte de Francamente Cariño, dupla responsable de podcasts como MBA Mal, Novo Novo Cinema Galego ou GAMESA. Na actualidade dirixe e presenta A Catapulta, en colaboración co Salto Galiza, un programa sobre poesía que se emite mensualmente en directo nas canles de Youtube e Twitch de El Salto e que se pode escoitar en formato podcast.

Foi baixista da Terbutalina desde a súa formación ata 2017, publicando sete traballos discográficos coa banda e actuando en centos de concertos. Durante un ano tamén foi baixista en Thee Blind Crows, cos que publicou tres discos.

Samuel L. París, agora tamén en imaxes estáticas

Se precisas unha foto, podes usar esa de aí ou descargala. É difícil poñelo máis fácil (ollo ao contraste fácil-difícil da anterior oración).

Descargar